填30間咁多？排錯位隨時跌Band？小編教你「避開伏位」！唔係一定要入Band 1先叫贏，入啱學校先係真正贏。
❓ Q : 聽人講乙部係「大抽獎」，咁我將所有Band 1學校排晒喺頭，搏一搏得唔得？
💡 答：呢個係升中派位最致命嘅自殺式填表法。
派位機制係 「處理完所有Band 1學生先到你」。假設你小朋友係 Band 2 學生，就算你將 Band 1 學校填喺第一位，只要全港 Band 1 學生都揀完，間學校冇位剩，電腦就會直接跳去睇你嘅第二志願。
☠️後果：你頭5個志願用晒嚟填 Band 1 學校，結果全部落空。到你真正有機會入嘅 Band 2 學校，人哋已經俾放佢哋喺第一志願嘅學生揀晒，你就會一直碌到好後嘅志願。
✅ 忠告： 第二志願開始就一定要現實，要填適合小朋友Banding嘅學校。記得要進可攻退可守。全軍一搏，可以好大獲！
❓ Q ：老師成日話揀「適合能力」，但我點知小朋友係咪真係唔可以越級挑戰？
💡 答：我哋要信數據，多過信「我覺得佢得」。小學呈分試排名係最客觀嘅指標。如果小朋友係邊緣人（Band 1尾 / Band 2頭)，強行入咗Band 1英中，佢面對嘅係全港Top 30%嘅對手。同樣道理，小朋友係Band 2尾/Band 3頭，入左Band2亦未必一定「適合」。
☠️現實問題：英文教學跟唔上、測驗次次包尾、自信心受挫、課外活動冇機會玩。與其做「鳳尾」，不如做「雞頭」。喺學校考頭20%，大學揀科、校長推薦計劃、甚至入大學嘅機會都係高嗰批。
❓ Q : 咁多中學，我點樣快速判斷邊間係「校風好但成績唔係最Top」嘅好學校？
💡 答：除咗睇公開試成績，家長記得睇兩個隱藏指標：
1. 學校網頁「學生成就」及「校園生活」版塊：係淨係貼幾個狀元出嚟？定係好多唔同種類嘅獎項（運動、藝術、STEM、義工服務）？後者代表學校願意俾機會唔同能力嘅學生發光，多元發展，讀得開心。
2. 實地觀察放學：抽時間去學校門口睇學生放學，佢哋講粗口多唔多？校服整齊嗎？面容開懷嗎？同異性相處有冇分寸？放學係咪好似放監咁狂奔大叫？呢啲先係最真實嘅校風，咩Banding學校一樣有好有壞，問題是多數定少數？。
❓ Q：我小朋友係 Band 2 尾 Band 3 頭，我係咪應該填晒 Band 2 學校搏一搏？
💡 答：我明白家長嘅心情，覺得唔填好似對唔住小朋友。但派位機制有時好現實。試幻想一個情境：派位當日，你見到結果係一間你完全冇揀過、甚至連地址都唔知喺邊嘅學校。然後先發現，原來因為前面啲志願博得太盡，後面又冇認真揀嚟「守龍門」。
✅ 婉轉建議：與其將命運交俾電腦隨機分配，不如喺乙部早啲嘅志願，揀一間你親身去過、見過啲學生有禮貌、你覺得安心嘅學校。起碼嗰六年，你夜晚係瞓得著覺嘅，唔使日日擔心佢放學會去咗邊或者與同學間的相處有題。
❓ Q : 填表嗰日，如果爸爸媽媽意見不合，一個要搏、一個要穩，聽邊個好？
💡 答：如果真係咁嘅情況，聽小朋友嘅。升中係小朋友讀，唔係家長讀。呢個年紀嘅青少年，如果去一間佢極度抗拒嘅學校，佢會用「躺平／唔溫書」嚟抗議。小朋友開始成長，應該學習參與影響自己前路的決定。
✅ 終極建議： 坐低同小朋友一齊上學校網頁睇相、睇片，問佢：「如果第日要著呢套校服返學六年，你覺得OK嗎？」
選校嘅最高境界，係家長覺得穩陣！小朋友覺得鍾意！
***以上純屬小編個人意見***